KALIBO, Aklan—Maskin nga ginbawi eon it lokal nga gobyerno it Malay ro surgical lockdown nga ginpatuman sa zone 1 it Barangay Yapak sa isla it Boracay umpisa alas-11:59 it gabi-i ko Abril 29, nagapadayun ro hugut nga monitoring it barangay council kontra sa mga pasaway nga mga pumueuyu.
Suno kay Punong barangay Hector Casidsid nga nagnaba eon ro kaso it andang COVID-19 patient rason nga owa eon gin-extend ro lockdown.
Aminado si kapitan Casidsid nga mabudlay engkaso nga makaangkon eon man it lockdown bangud sa kakueangan it pondo.
Samtang, plano sigon makaron it LGU-Malay nga hugtan pa ro pagsueod-guwa it mga residente ag mga tourism workers kamana man ro pagsunod sa minimum public health standards agud nga indi eon magkalhit ro coronavirus infection nga eubus nga nakaapekto sa industriya it turismo sa boracay bangud sa kawad-an it mga turista.
Sa abiso it LGU-Malay, ro religious gatherings hay ginapasugtan eon basta masiguro nga 30% eamang it venue capacity ro mga magatambong.
Suspendido gihapon ro operasyon it mga bars, restaurants ag food parks nga may live shows ag music kamana man ro bueang ag operasyon it mga bueangan ag non-essential gatherings kapareho it mga parties ag selebrasyon.
Limitado anay ro mga restobars sa andang restaurant services.
Ro curfew hours hay magapabilin sa alas 11:00 it gabi-i hasta alas 4:00 it aga-aga.
Kinahangean man ro pagsuksok it face masks ag face shield sa tanan nga oras samtang sa guwa.
Ro Barangay Yapak hay ginbalik sa quarantine classification nga modified general community quarantine (MGCQ).
Base sa health bulletin it Malay Inter-Agency Task Force Against COVID-19, naga abot sa 36 ro nailistang kaso it deadly virus sa yapak.
13 ro aktibong kaso ag daywang bag-ong pasyente ro nagmayad ag owa eon it bag-ong kaso.
