KALIBO, Aklan—Ginklaru ni Malay mayor Frolibar Bautista nga ginapasugtan sa gihapon nga makasueod ukon makabisita sa isla it Boracay ro mga turista halin sa “NCR Plus” ukon Metro Manila, Bulacan, Laguna, Cavite, ag Rizal.
Epektibo sa Agosto 6 hasta Agosto 20 hay nakataeanang igapaidaeum sa pinaka-instriktong quarantine classification ro NCR plus bangud sa paeag it delta variant.
Halin sa GCQ with heightened restrictions hay igapaidaeum raya sa enhanced community quarantine ukon ECQ.
Suno kay mayor Bautista nga magahueat pa sanda it abiso maghalin sa provincial inter-agency task force sa pagsunod sa ginpaguwa nga IATF Resolution 130-A kun sa siin bawae anay ro leisure travel halin sa metro manila ag kaiping nga mga siyudad.
Gindugang pa ni Mayor Bautista nga owa pa it pagsuspinde sa pagbiyahe rason nga pwede pang padayunon it mga turista ro andang scheduled travel.
