KALIBO, Aklan—Ginklaru it lokal nga gobyerno it Malay nga owa pa it may nailistang kaso it bag-ong variants it coronavirus disease (Covid-19) sa isla it Boracay.
Suno kay Malay mayor Frolibar Bautista nga nagpadaea eon sanda it daywang sample sa Manila agud nga ipaidaeum sa genome sequencing ukon ro proseso nga ginapatigayon agud nga matumod ro Covid-19 variants.
Madasig suno kana nga napatigayon ro contact tracing ag na-identify eon ro mga close contract ag hugut nga gina-monitor ro andang hueag.
Sa kamatuoran suno kana, sa kabilugan nga 52 nga ginpaidaeum sa swab testing ko nagtaliwan nga adlaw hay sambilog eamang ro nag positibo.
Raya hay nagakahueugan suno kana nga kontrolado eon ro sitwasyon.
Gindugang pa ni Bautista nga ginamonitor nanda makaron ro sitwasyon ag ro mga kaso eabi eon sa barangay Balabag nga ginpaidaeum sa enhanced community quarantine ukon ECQ ag Purok 1 ag 7 it Manocmanoc nga naka-surgical lockdown.
Engkaso suno kana nga padayun nga magtaas ro kaso it covid 19 sa barangay Manocmanoc hay posibleng ipaidaeum man raya sa ECQ.
Apang sa makaron hay may mga ginahueat pa sanda nga resulta it RT-PCR test.
Sa pinakaulihing record it Malay Inter-Agency Task Force nga may petsang Marso 31, 2021, naga abot eon sa 135 ro kabilugang kaso it COVID-19 sa nasambit nga banwa umpisa nga tumama ro pandemya.
Raya hay matapos nga makalista it 24 nga bag-ong kumpirmadong kaso.
14 sa bag-ong kaso hay naghalin sa Barangay Manocmanoc ag 10 ro halin sa Barangay Balabag.
Depende sigon sa magiging sitwasyon kun pagapaeawigon pa ni Mayor Bautista pagkatapos it Abril 14 ro ginpatuman nga bag-ong quarantine classification.
Nauna kara, ginasugid nga sangka guest nga taga-Manila nga positibo gali sa COVID-19 ro naki-party sa sangka bar sa isla ag natapnan kara ro kaabuan sa anang mga nakasalamuha.
Nakabalik eon raya sa Metro Manila kat masayuran nga infected raya it virus.
