KALIBO, Aklan—Kumpiyansa ro lokal nga gobyerno it Malay nga mas pang magataas ro tourist arrivals sa isla it Boracay makaron nga aprubado eon ro hinyu it Department of Tourism nga pagasabton nanda ro katunga it presyo it coronavirus disease (COVID-19) test para sa mga turista eabi eon makaron nga Christmas season.
Raya hay kasunod it pagpirma it kasugtanan ni Tourism Secretary Bernadette Romulo-Puyat sa Philippine General Hospital.
Pagasabton it DOT ro 50 porsyento it P1,800 pesos nga balor it RT-PCR test nga pagahimuon it PGH.
Suno kay Malay mayor Frolibar Bautista nga ginareklamo it mga turista ro mahae nga swab tests nga sambilog sa mga requirements antes nga makasueod sa isla.
Sa mga interesado , mag-agto eamang sa www.tpb.gov.ph/rtpcrphtravel agud nga magrehistro ag makabo-oe it 50 percent subsidy limang araw antes ro nakataeanang pagbiyahe.
Kinahangean nga magsumite eang it kopya it valid government-issued ID, confirmed accommodation booking ag proof of transportation ticket.
Gindugang pa it DOT nga 100 test kada adlaw eamang ro pwedeng pagahimuon it PGH ag igapatuman ro first-come, first-served basis.
Gindugang pa ni bautista nga nagapabilin nga covid free ro boracay rason nga eowas nga magbakasyon eabi pa ag nagasunod ro tanan nga mga tawo sa health protocols ag kompleto ro tanan nga medical facilities para sa COVID response.
