KALIBO, Aklan — Haum nga makipagbueoligan ro LGU-Malay sa Department of Enviroment and Natural Resources (DENR) ag Department of Tourism agud insigidang masolusyunan ro mga gina pangatubang nga problema sa isla it Boracay.
Suno kay Malay Mayor Ceciron Cawaling, naayos eon nanda ro masangsang ag gabundok nga basura kamana man ro pagbaha sa Sitio Pinaungon, Brgy. Balabag, Boracay.
Suno kana nga imaw mismo ro nakatukib nga nagahalin sa naga awas nga manhole it sewerage manhole it Boracay Island Water Company ro mabaho ag owa naga hupang baha sa lugar.
Sa pihak nga parte, nakadepende sigon sa natungdan nga ahensiya it gobyerno ro mga pagahiwaton nga tikang matapos gin basura ni Pangueong Rodrigo Duterte ro gina pangayu it DoT nga magbilog it Executive Order para sa pagbilog it Boracay Inter-Agency Task Force.
Sa baylu hay gin taw-an sanda it an-um nga buean nga ultimatum kaibahan ro DILG agud ayuson ro mga problema sa isla eabi eon ro masaming pagbaha, basura ag pagpatukod it mga istraktura sa mga gina kabig nga protected area.
Plano man it DoT nga ipaiway anay ro pagtao it accreditation sa mga establisimento nga mag eabag sa environmental laws.
Madumduman nga haeos 100 hotels ag resorts ro natukibang iligal nga naga konektar sa drainage pipe it Metropolitan Waterworks and Sewerage System sa baylu nga maghimo it kaugalingong sewage treatment facilities.
