KALIBO, Aklan–Sa baylo nga ro tradisyunal nga fireworks display, pagabayluhan it lokal nga gobyerno it Malay it drone light show ro pagsug-aeaw sa bag-ong dag-on sa isla it Boracay.
Suno kay Rex Aguirre, Tourism Officer Head of the Culture and the Arts and Special Events Division it LGU-Malay nga raya ro kauna-unahan nga kahigayunan nga uman sanda nga magapatigayon it bonggang new year’s eve countdown pagkatapos it an-um nga buean nga pagsarado sa isla ko 2018 nga ginsundan it haeos daywang dag-on nga lockdown tuga it covid-19 pandemic.
Ginpahayag dugang nga nauna eon nga ginbawae it Department of Environment and Natural Resources ro paggamit it fireworks displays sa Boracay tuga it epekto kara sa palibot ag kasapatan.
Pinaagi sa modernong teknolohiya hay ginakonsidera sigon it LGU ro drone light show nga magapahayag sa kaeangitan it isla sa pagsug-aeaw sa bag-ong dag-on.
Nagpanindugan ro Boracay Inter-Agency Task Force (BIATF) ko 2019 nga sandig sa patakaran sa ginhimo nga rehabilitasyon, ginabawae ro fireworks sa beach nga naging patok sa mga turista.
Sa makaron hay padayun pa nga naga-usoy it partners ro LGU nga posibleng makasabat sa gastos nga kinahangean para sa drone light show.
Ginasugid nga ro nasambit nga tikang hay kaparte it andang selebrasyon sa uman nga pagbalik it tourist arrivals sa pre-pandemic levels.
