(Updated) KALIBO, Aklan— Magata-o it bulig pinansyal ro Local Government Unit (LGU) Malay sa mga biktima it sunog nga nag-ugdaw sa kapin 35 ka mga panimaeay ag 3 commercial establishment sa Sitio Bantud, Barangay Manoc-manoc sa isla it Boracay.
Sa ginpatigayong pueong it Municipal Disaster Risk Reduction Management Council (MDRRMC)-Malay, ginkasugtanan nga magata-o ro lokal nga gobyerno it P6,000 sa mga pamilyang nasunugan it baeay; P3,000 sa pamilyang naga-istar eamang; ag P1,000 sa mga boarders nga nagarenta sa nasambitang lugar.
Samtang, uwa pa sigon ginapasugtan it Bureau of Fire Protection (BFP) Boracay sub-station ro mga apektadong residente nga magpatindog it uman it andang baeay ag anumang istraktura hasta sa uwa pa natapos ro 45-day investigation period nga ginahimo it BFP.
Bangud kara, padayon nga nakabantay ro pulisya sa apektadong lugar para mapabilin ro kaayusan ag seguridad.
Nasayuran nga sa pinakaulihing datos it Malay Social Welfare Development Office (MSWDO), nag-abot sa 74 nga pamilya ukon katumbas it 276 nga mga indibidwal ag 73 mga boarders ro nawad-an it ilistaran.
