KALIBO, Aklan—Aprubado eun sa second reading ro proposisyon nga nagatuyong magtukod it Boracay Island development authority ukon BIDA bill sa Isla it Boracay sa idaeum it Government owned and controlled corporation (GOCC).
Suno kay Christine Hope Pagsugiron, Malay SK Federation President nga eubos nandang ginakasubo ro pagpabor it maabong kongresista sa ginaproponer nga BIDA bill.
Medyo owa gid sigon ginpamatian it mga raya ro ginpadaea nga mga sueat it lokal nga gobyerno sa Aklan kung sa siin nagapahayag it andang hugot nga pagpamaeabag sa nasambitan nga proposisyon.
Sa pihak kara, nagaeaum man sanda nga mapamatian ro andang pag-apela kung magsaka eun sa senado ro pagbasa it nasambitan nga bill.
Haeos klaro eun man sigon nga owa sanda it pagaeauman sa third and final reading it kogreso bangud mas maabo ro nagapabor sa BIDA bill nga nga sa idaeum it GOCC rason nga posible pa gid rayang maaprubahan.
Kung madumduman, nauna eun nga ginpamaeabagan it maabong mga residente ag mga pulitiko sa probinsiya ro nasambitan nga proposisyon ag ginapahayag pa nga raya hay sangka pag-eabag sa local code it probinsiya.
