KALIBO, Aklan — Sa tunga it nagapadayun nga rehabilitasyon sa isla it Boracay nga una eon sa phase II makaron, nagbilog ro lokal nga gobyerno it Malay it sangka komite agud nga mag-review it plano ag desinyo para sa mga istraktura sa isla nga nakasunod sa standard nga tropical design ag environmental regulations.
Suno kay Malay Mayor Abram Sualog, raya hay base sa anang ginpirmahan nga Executive Order No. 10 nga may petsang Marso 19, 2019 angot sa pagbilog it Municipal Planning and Urban Design Guidelines Review Committee.
Obligasyon it komite nga mag-review it mga plano para sa pagpatindog it mga bag-ong istraktura ukon pagahimuon nga renovations it mga buildings sa Boracay kamana man ro pag-inspeksyon kara agud nga masigurong nagasunod ro bag-ong design brand it isla.
Suno kay Alfredo Orolfo, Deputy Ground Commander it Department of Environment and Natural Resources (DENR) Task Force Boracay nga tuyo kara nga mas pang makilaea ro isla bilang sangka tropical island paradise ag maipakita ro katutubong kultura ag mga produkto.
