Bangud sa ginaduso nga pagbukas it Boracay sa mga international tourists pinaagi sa travel bubble, ginhinyu ni Malay mayor Frolibar Bautista sa Boracay Inter-Agency Task Force nga bukon eamang ro mga tourism workers ro dapat nga taw-an it prayoridad sa bakuna kontra sa coronavirus disease 2019 ukon COVID-19 kundi ro bilog nga komunidad it isla.
Kinahangean sigon it mga pumueuyu nga makaangkon it nagakaigo nga proteksyon kontra sa deadly virus.
Sa ginpatigayon nga virtual meeting, ginpasiguro sigon kana it BIATF nga igapasaka ro nasambit nga hinyu sa National Inter-Agency Task Force.
Ginhimo sigon nana ro nasambit nga advance request bangud nga ro tourism sector sa Boracay hay may mabahoe nga kontribusyon sa ekonomiya it Pilipinas.
Naintindihann sigon ni mayor Bautista ro patakaran sa pagbakuna kun sa siin prayoridad kara ro una sa health sector ag mga senior citizens.
Apang nagaeaum imaw nga engkaso nga mag abot eon ro bulto it mga bakuna hay unahon it national government ro tourism sector partikular ro Boracay sa listahan it mga recipient.
Sa makaron, ro nabakunahan pa eamang sa Aklan hay ro mga healthcare workers gamit ro donasyong bakuna nga sinovac.
