KALIBO, Aklan – – – Gin pamalibaran it lokal nga gobyerno it Malay nga sanda hay naga pangayu it sang milyong pisos maghalin sa
mga establisyemento sa isla it Boracay agud kakason ro andang pangaean sa master list it mga violators.
Raya hay kasunod it balitang may pilang mga grupo sigon ro naga pakilaeang mga opisyal it lokal nga gobyerno ag ginagamit ro pangaean it alkalde ag hepe it kapulisan.
Sa interview it Bombo Radyo Kalibo, gin pahayag ni Rowen Aguirre, Executive Assistant to the Mayor it LGU Malay nga owa raya it kamatuoran.
Suno kay Aguirre, sangka modus raya it mga tawong opurtunista ag gina panipuslan ro sitwasyon sa isla it Boracay.
Gin klaro pa it opisyal nga sa alima it Department of Environment and Natural Resources (DENR) ro mga listahan it violators dahilan nga imposibli nandang mahimo raya.
May kaangtanan kara, gina laygayan ro mga pumueoyo nga magpabilin nga mapagmatyag sa nasambitang modus.
