KALIBO, Aklan—Nagpanawagan ro mga lokal nga opisyal ag tumandok it banwa it Malay ag isla it Boracay kay Pangueong Ferdinand ‘Bongbong’ Marcos Jr., nga amyendahan ro naga-eksister nga Presidential Proclamation 1064 nga ginpaguwa ni dating Pangueong Gloria Macapagal-Arroyo ko 2006.
Raya hay may kaangtanan sa pag-classify sa isla it Boracay bilang forest land ag agricultural land.
Ro panawagan hay ginpatigayon sa ginpatawag nga public forum kasunod sa isyu nga ginapangatubang it mga katutubong Ati sa Boracay kun sa siin may nagaprotesta sa gintau kanda nga certificate of land ownership awards ukon CLOA sa Department of Agrarian Reform ukon DAR Region 6 nga ginpaburan man it nasambit nga ahensiya it gobyerno.
Nasayuran nga gustong ipakansela it mga nagaprotesta ro CLOA bangud sa alegasyon nga ro eugta nga gina develop it mga katutubo hay owa nagakabagay para umhan ukon agricultural purposes.
Angot kara, ginpahayag ni Malay mayor Frolibar Bautista nga nakakabatyag imaw makaron it paghinoesoe bangud sa pagbaligya kato anay nga tiempo it anang mga ginikanan it pila sa andang mga ginapanag-iyahan nga eugta sa mga mabahoe nga negosyante ag land developers nga dapat kunta hay sandang mga tumandok ro nagapanipueos makaron.
Madumduman nga pinaagi kay dating Pangueong Ferdinand Marcos Sr., hay nadeklara ro Boracay pinaagi sa proclamation no. 1801 bilang tourist zone and marine reserves rason nga napundo ro maeapnagon nga pagbinakae it mga eugta.
Madumduman nga base sa proklamasyon ni dating pangueong arroyo, kapin sa 628.96 ektarya it eugta ro ginakabig nga agricultural land (alienable and disposable) ag ro nabilin nga 281.81 ektarya ro ginakonsidera nga forest land nga indi pwedeng mapatindugan it anuman nga istraktura.
