KALIBO, AKLAN — Nagpaandam ro Department of Environment and Natural Resources (DENR) nga pwedeng makasuhan ro LGU-Malay bangud sa maalingasaw nga hugom halin sa nagatumpok nga basura sa centralized material recovery facility (MRF) sa Brgy. Manoc-Manoc, Boracay.
Suno kay PENRO-officer Ivene Reyes nga bangud sa bukon it maayos nga tambakan it basura, matsa open dump site eon raya kabangdanan nga insigidang nagpaguwa it mandato nga ipasarado ag papunduhon ro pag-operate kara.
Ginpahayag dugang nga uwa it sistemang ginasunod sa pagpilak it mga basura ag pag-eobong it biodegradable waste sa MRF nga sangka pag-eabag sa RA 9003 ukon Ecological Solid Waste Management Program.
Samtang, nagpromisa sigon si Malay Mayor Ceciron Cawaling nga insigidang pagadaehon ro mga nabilin nga basura sa sanitary landfill sa Brgy. Cabulihan, Malay.
Base sa reklamo it mga residente ag principal it Manoc-Manoc Elementary School nga Oktubre 2016 kat nag-alingasaw ro hugom it basura sa lugar kabangdanan nga ginpaabot ro problema kay DENR Sec. Gina Lopez.
