KALIBO, Aklan—Suportado it lokal nga gobyerno it Malay ro pagtukod it Boracay Island Development Authority (BIDA) basta inde magsapaw sa andang trabaho.
Suno kay Malay Mayor Frolibar Bautista manami nga balita ro gusto ni Pangueong Rodrigo Duterte nga anang nasambit sa ika-limang State of the Nation Address (SONA) ko adlaw it Lunes bangud para sigon raya sa kamaeayran it isla.
Importante sigon ro BIDA sa nagapadayon nga rehabilitasyon sa Boracay eabi eon ag pila sa mga proyekto hay nagakinahang-ean it mabahoe nga pondo.
Engkasong maging laye, ro pondo it BIDA hay igaeakip sa General Appropriations Act.
Dugang pa kara nga igakonsulta kanda ni Aklan Governor Florencio Miraflores bilang mga miyembro it Boracay Inter-Agency Task Force ko nagtaliwan nga buean ro proposisyong laye kaangot kara kon sa siin ginpamatian man ro pila sa andang mga suhestiyon.
Ginpahayag dugang ni Mayor Frolibar nga suportado it Aklan Congressmen ro nasambit nga proposisyon bangud ro katuyuan kara hay para sa ikamayad it turismo.
