KALIBO, Aklan—Uman nga ginpasugtan it lokal nga gobyerno it Malay ro pagpaligos sa dagat ag pagpatigayon it iba pang mga water activities sa Isla it Boracay.
Raya ro ginkumpirma it Malay Tourism Office.
Madumduman nga temporaryong ginbawae ro mga aktibidad sa baybayon ko weekend bangud sa pagtuhaw it sangkaterbang mga maintok nga jellyfish ukon buroe sa haeos tatlong estasyon it isla.
Suno sa Bureau of Fisheries and Aquatic Resources ukon BFAR nga delikado ro mga raya bangud nga posibleng magtuga it pagpaeangatoe ukon allergy.
Umpisa ko domingo nga adlaw hay amat-amat eon nga naduea ro mga buroe sa kilid it baybay rason nga ginbo-oe eon ro ginbutang nga red flag warning para sa mga turista.
Ginasugid nga bangud sa Hagabat rason nga inanod ro mga raya sa kilid it baybay.
