KALIBO, Aklan—Naka-half mast makaron ro bandera it munisipyo it Malinao, Aklan matapos mabaril ag mapatay si dating sangguniang bayan member John Rondario.
Suno kay Malinao Mayor Josephine Iquiña nga pagkatapos it andang flag raising ceremony Lunes it agahon hay naghaead sanda it pangamuyo para sa dating opisyal it banwa.
Kasunod kara, nagderetso sanda sa sangka punerarya sa banwa it Numancia kaibahan ro iba pang municipal ag barangay official agud nga sueangon ro bangkay ni Rondario ag ginhatud sa andang baeay sa Brgy. San Roque, Malinao, Aklan kun sa siin, nakahamyang makaron.
Sa pihak nga parte, mabahoe ro pagpati ni Mayor Iquiña nga posibleng may kahilabtanan sa nagtaliwan nga election ro natabu nga pagpatay kay Rondario.
Suno kana nga nagserbeng campaign manager it andang grupo si Rondario kun sa siin nakabulig raya it mabahoe sa landslide nanda nga kadaeag-an rason nga posibleng may nagtanum it kaakig kana.
Matapos sigon ro pag-istorya nanda it grupong Tibyog hay nabilog ro conclusion nga ro insidente hay kaparte pa it nagtaliwan nga election.
Nagpanindugan man ro alkalde nga dapat nga maresolba ro krimen sa mas madali nga tiempo.
Sa makaron sigon hay nagatipon sanda it reward money para sa madasig nga ikasolbar it kaso.
