Kalibo Aklan —-Mas pang ginhugtan it lokal nga gobyerno it Nabas ro andang border control maskin nga nakalista it zero-covid case ro nasambit nga banwa .
Suno kay Mayor James Solanoy nga tanan nga mga nagasueod sa andang banwa hay ginapaidaeum sa hugut nga screening kapareho it pag-check sa andang body temperature ag pag-usisa sa lugar nga andang ginhalinan .
Daywang hotel suno kana sa Nabas ro andang gin-arkila agud nga pagabutangan it mga maga-uli mga Overseas Filipino Workers (OFW’s) ag stranded nga mga kasimanwa halin sa mga lugar nga infected it virus .
Kon si Mayor Solanoy sigon ro pagakutan-on hay pabor imaw nga paeawigon pa sa Aklan ro Enhanced Community Quarantine hasta sa Mayo 15.
Sa pihak nga parte, nagapadayun suno kana ro andang validation sa mga kwalipikadong makabaton it ayuda halin sa Social Amelioration Program (SAP).
Posibleng sa lunes suno kana hay maka-distribute eon sanda it tig-6,000 pesos nga bulig pinansiyal sa mga benepisyaryo .
Mabahoe man suno kana ro anang pagpasaeamat sa NGCP sa pag-augment sa ginapanupod nga food packs mag-eowas pa sa Provincial Government ag DSWD Regional Office.
Posibleng sa Mayo 5 suno kana hay makapanupod sanda para sa second wave.
Maskin suno kana ro stranded nga mga workers halin sa Boracay nga owa eon naka-eapos pauli sa Antique ag iba pang probinsiya hay ginataw-an nanda it food packs .
