KALIBO, Aklan—Ginpadumdum it lokal nga gobyerno it New Washington sa mga mangingisda nga hugut anay nga ginabawaean ro pagdakop it pilang klase it isda sa kaeawran nga sakop it andang banwa.
Ginpahayag ni Marlon Rufin Magbiro, Municipal Agriculturist it New Washington, nga epektibo eon ro pagpatuman it close season sa pagdakop ukon baligya it mga isda kapareho it tamban ag mackerel ukon hasa-hasa umpisa ko Nobyembre 15 hasta Marso 15, 2022.
Kada dag-on hay nagapatuman sigon sanda it close season para sa nasambit nga mga isda sandig sa andang Municipal Ordinance partikular sa Fishery Code of 2020.
Tuyo kara nga maprotektahan ag mataw-an it tyempo ro mga isda nga magpaabo it andang species para makaangkon it maabo nga dakop ro mga lokal nga mangingisda.
Antes ro opisyal nga pagpatuman it close season, nagpatigayun anay sigon sanda it pueong kaibahan ro mga asosasyon it mangingisda para ma-impormahan ro mga raya.
Ro sin-o man nga madakpan nga mag-eabag sa nasambit nga mandato hay posibleng magpangatubang penalidad, pagkumpiska it paraphernalia ag pag-revoke it lisensya.
Ginlaygayan man kara ro mga negosyante nga magbakae ukon magligya eon lang anay it ibang klase it isda samtang naga-iral pa ro pagbawae.
Samtang, gina-engganyo man ro mga apektadong mangingisda nga magpananom ukon pabaskugon ro vegetable production para makaangkon it ibang paeangitan-an samtang nagahueat nga matapos ro close season.
