Kalibo Aklan——Ginapasugtan it lokal nga gobyerno it New Washington ro pagpaligos sa kaeawran nga sakop it nasambit nga banwa may kaangtanan sa selebrasyon it kapiestahan ni San Juan de Bautista hin-aga nga adlaw, Hunyo 24.
Raya hay sa atubang it paeag it coronavirus disease (COVID-19), kun sa siin, ro Aklan hay nagapabilin sa Modified General Community Quarantine (MGCQ).
Sa pihak kara, ginpahayag ni New Washington Mayor Shimonette Peralta-Francisco nga hugut nga igapatuman ro health protocols partikular ro mandatory nga pagsuksok it face mask ag social distancing .
Dugang pa it alkalde nga magapatuman sanda it limitasyon sa mga pwedeng makabiyahe pasueod sa andang banwa agud nga masiguro nga masunod sa gihapon ro guidelines it National Inter-agency Task Force on Emerging Infectious Diseases .
Sandig sa mandu, bawae gihapon nga makaguwa it baeay ro mga naga-edad it 60 pataas ag 21 anyos panaba kamana man ro mga nabdos.
Owa man ginapasugtan ro pag-inom it makahieilong nga ilimnon sa mga pampublikong lugar.
Nasayuran nga sambilog ro Barangay Tambak sa nasambit nga banwa sa mga ginadayo it mga pumueuyu agud nga magpatigayon it selebrasyon kada kapiestahan ni San Juan de Bautista.
