Kalibo Aklan — Gin-umpisahan eon it lokal nga gobyerno it Tangalan ro pagdeliver it mga relief goods sa 15 ka barangay nga nasakupan it nasambitang banwa.
Suno kay Tangalan Mayor Gary Fuentes, ro andang ginapanueopod nga relief goods hay ginakaeakipan it 10 kls. nga bugas, an-om nga bilog nga noodles, an-om nga lata it canned goods, an-om nga bilog nga 3in1 coffee, daywa ka sabon, napueong bilog nga vitamin B ag napueong bilog man nga vitamin C.
Ro budget sigon kara hay halin sa 30 percent nga quick response fund kasunod it declaration it public health emergency ni Pangueong Rodrigo Duterte.
Una kara, nakapanueopod eon it relief goods ro kada barangay halin man sa andang 30 percent nga quick response fund.
Ro ginapangatubang nga krisis makaron hay uwa it timeline nga ginasunod eain sa natural nga kalamidad kaparehas it bagyo ukon linog.
Apang, preparado sigon sanda sa pinaka-worst nga scenario nga matabo sa andang banwa.
Ro ginata-o nga food packs hay uwa it ginapili nga household mapa-manggaranon ukon pobre man.
Ginkalipay man kara ro action it pila ka mga household nga may sarang sa kabuhi nga nagapamalibad nga magbaton it relief goods kon sa siin naka-save sigon kara ro LGU ag ginata-o sa mas pang nagakinahang-ean it husto.
Ginapahayag dugang nga door to door ro andang pagpanupod it relief goods agud nga masunod ro social distancing ag inde eon kinahang-ean nga magguwa it baeay ro kada household.
