KALIBO, Aklan—Kapin sa 100 doses it Sinovac vaccine ro nabatun it Local Government Unit ukon LGU-Tangalan maghalin sa Department of Health pamaagi sa Provincial Health Office ukon PHO-Aklan.
May kaangtanan kara, ginpahayag ni Tangalan Mayor Gary Fuentes nga kahapon nga adlaw hay nagpatigayon eun sanda it kauna-unahang vaccination roll out.
Ro nasambitan man nga bakuna nga nabatun it andang banwa hay nakataeanang igabakuna sa mga Barangay Health and Emergency Response Team (BHERTs) ag empleyado it Municipal Disaster Risk Reduction Management Office (MDRRMO).
Kaibahan pa sa mga mabakunahan hay ro mga Punong Barangay Committee on health, Barangay Health Workers ag iba pang frontliners sa Brgy. Tagas Covered Court nga magaserbeng vaccination site.
Dugang pa kara nga haeos maga-abot it 200 ro numero it mga frontliners sa andang banwa rason nga nagaeaum pa sandang may maga-abot pang 100 doses it bakuna.
Pagaeauman dugang suno pa kana nga sa mga masunod nga adlaw hay maga-abot man ro dugang nga bakuna para sa andang pomoeuyo.
