KALIBO, Aklan—Nagpaandam si Libacao Mayor Charito Navarosa sa mga padayun nga naga-eabag sa health and safety protocols sa andang banwa nga may ginpahaum imaw nga body bags ag eubungan para sa mga raya.
Suno sa alkalde raya hay sambilog sa anang pamaagi para mataw-an it punto nga ro Coronavirus Disease 2019 (COVID-19) hay sangka makamataeay nga sakit rason nga dapat eamang nga doblehon ro pagdahan.
Raya hay matapos nga matueopangdan ro padayun nga pag-abo it mga kaso sa nasambit nga banwa nga naga-abot eon sa 45.
Sa anang Facebook post, nagpahaum sigon ro LGU-Libacao it 100 body bags ag 20 catacombs sa mga pasaway nga residente nga madakpan nga naga-eabag sa health guidelines.
Naga-eaum ro lokal nga gobyerno nga sa makarondaya nga pamaagi hay mapadumduman ro publiko sa mga kinahang-ean nanda nga ubrahon para makabulig nga mabawasan ro kaso sa COVID-19.
Mag-euwas sa munisipyo, temporaryo man nga ginsarado ro andang Rural Health Unit matapos magpositibo sa deadly virus ro pila sa andang mga empleyado.
Adlaw-adlaw nga nagapatigayun it disinfection ag paglimpyo sa andang tindahan, municipal building, mga kalye, paradahan ag Municipal Health Office.
Kapin sa 9 nga baeay man ro ginpaidaeom sa surgical lockdown sa banwa it Libacao.
