KALIBO, Aklan—Nagpositibo sa Coronavirus Disease 2019 ukon COVID-19 si Libacao Mayor Charito Navarrosa.
Raya ro ginkumpirma ni Dr. Aldrinne Fernandez it Municipal Health Office (MHO)-Libacao sa interview it Bombo Radyo Kalibo.
Suno kana, kaibahan ro alkalde sa waeong nagpositibo sa andang banwa ko adlaw it Huwebes.
Una kara, nagpa-check up sa sangka pribadong ospital sa banwa it Kalibo si Mayor Navarrosa kun siin nagpaidaeom imaw sa rapid antigen test bilang pagsunod sa protocols it mga ospital ag dikara natukiban nga positibo imaw sa deadly virus.
Agud nga eubusang makumpirma, ginpaidaeom imaw sa RT-PCR test ag uman nga nagpositibo.
Nagapabilin man nga asymptomatic ro alkalde ag presenteng naka-admit sa Aklan Provincial Hospital bangud imaw hay may comorbidities.
Ginpasiguro man ni Dr. Fernandez nga manageable pa ro sitwasyon it COVID-19 sa andang banwa ag nagapadayun ro maidid nga contact tracing.
Sa makaron, naga-abot eon sa 101 ro total cases it Libacao kun sa siin 13 pa ro nabilin nga aktibong kaso.
