Kalibo Aklan ——-Matapos nga putaktehon it reklamo ro social media account ni Libacao Sangguniang Bayan Member Napoleon Navarosa halin sa mga konsumidor it Aklan Electric Cooperative (AKELCO) nga nagareklamo sa sobrang pagtaas it andang bill sa kuryente hay naghimo it petisyon ro konseho agud nga magpangayo it kaklaruhan sa nasambit nga Electric Cooperative .
Suno kana nga maskin imaw hay nakibot sa nabaton nana nga electric bill .
Haeos nag-doble suno kana ro anang baeayran eabi eon sa “April to May” nga billing nga naging eampas sa 4,000 pesos maskin nga pilang appliances eamang ro andang gingamit sa tunga it ginapatuman nga Enhanced Community Quarantine sa Aklan bangud sa coronavirus disease (COVID-19) .
Sobra pa sigon raya sa andang konsumo kada naga selebrar sanda it kapiestahan .
Bangud kara, naintindihan sigon nana ro baeatyagon it anang mga kasimaryo nga haeos indi makabayad it bill sa kuryente bangud sa ginapangatubang nga krisis.
Samtang, ginpaathag ni Aklan Electric Cooperative (AKELCO) General Manager Engr. Alexis Regalado nga ro billing sa tiempo it ginpatuman nga ECQ sa Aklan hay average it ulihing tatlong buean nga konsumo.
Apang bangud sa pagpanaeasa it bagyong Ursula ko Disyembre , ro andang ginbasehan sa billing nga may nakatatak nga “estimate” hay umpisa September-October-November .
Natiempo pa suno kana nga ro buean it Nobyembre hay fiesta sa Poblacion Libacao rason nga ginaeauman nga mataas ro andang konsumo sa kuryente.
Ginpaathag pa ni Engr. Regalado nga may basehan ro andang computation sa sukot sa kuryente.
Sandig sa abiso suno kana it Energy Regularory Commission (ERC) hay pwedeng indi anay pagbayaran it bilog ro bill bangud nga paga-obrahon raya nga installment sa sueod it ap-at nga buean .
Apang mas mayad suno kana nga kon may kwarta man lang hay bayaran raya it bilog.
Gindugang pa kara nga umpisa buean it Mayo 1 hasta 11 hay nagpatigayon eon sanda it actual nga meter reading .
Ginlaygayan man nana ro mga konsumidor nga may reklamo sa andang bill nga para kanda hay bukon it makatarungan hay mag-agto eamang sa andang natungdan nga paying office.
