Nagapameligrong madueaan it libreng crop insurance ag iba pang ayuda it gobyerno ro libo-libong bukon it rehistradong mangunguma ag mangingisda sa Western Visayas suno sa Philippine Crop Insurance Corporation (PCIC) Region 6.
Raya hay kasunod it ginpabaskog nga kampanya it ahensya para sa pagparehistro sa Registry System for Basic Sectors in Agriculture (RSBSA) agud masiguro nga makabaton it proteksyon ag suporta ro sektor it agrikultura.
Suno kay PCIC-6 Regional Manager Eva Ulie Laud, ro mga nakarehistrong mangunguma hay may libreng crop insurance nga sabat it gobyerno sa idaeom it General Appropriations Act.
Sakop kara ro halit nga tuga it bagyo, baha, peste, ag sakit sa pananom.
Ginpahayag dugang nga maskin miyembro it grupo ro sangka mangunguma, kinahang-ean gihapon raya nga magparehistro it indibidwal agud makapanipueos sa programa.
Mag-eowas sa insurance, nagaserbing daean ro RSBSA para makabuoe it binhi, abono, pautang, ag iba pang ayuda para sa rehabilitasyon it taeamnan.
Gin-engganyo it PCIC ro tanan nga mangunguma ag mangingisda, kapin eon ro mga bag-ong sueod sa sektor, nga insigidang magparehistro sa andang tagsa ka LGU ukon municipal agriculture office.
