Amat-amat eon nga nagahubas ro tubi-baha sa haeos tanan nga distrito sa Bangkok, Thailand matapos ro pilang adlaw nga uwa it untat nga pag-inuean sa lugar.
Apang suno kay Bombo International News Correspondent Fernando Catane, nagapabilin nga eomos sa baha ro pilang komunidad ag nagapangunang karsadahon sa kabisera it nasambit nga nasyon.
Kapin sa 329,000 nga kabaeayan ukon ginatantyang 700,000 katawo ro naapektuhan it pagbaha ag daywa ro naireport nga namatay.
Dugang pa ni Catane, sigidas makaron ro pagpaabot it bulig sa mga vulnerable resident, kaibahan ro mga magueang ag persons with disabilities samtang haeos 7,000 katawo ro temporaryong nagapabilin sa mga evacuation center.
Pinakamalala suno kana ro pagbaha nga naeksperyensyahan sa nasidlangan nga bahin it syudad particular sa Bang Kapi.
Sa makaron suno kana hay may pabugso-bugso gihapon nga mga pag-uean sa nagkaeain-eain nga parte it Thailand rason nga nagpaandam ro meteorological agency kontra sa posibilidad it flash flood, pag-awas it mga suba, landslide ag nagaragasang tubi halin sa kabukiran.
