ENTERTAINMENT News — Gindumog it masobra 2 million nga katawo ro libre nga concert it kilaea nga pop star nga si Lady Gaga sa baybayon it Copacabana sa Brazil.
Raya ro pinakamaabu nga audience sa bilog nga karera ni Lady Gaga, ag ginpondohan it siyudad bilang kaparte it inisyatibo nga uman nga pagpabaskog it ekonomiya it Brazil.
Ginaeauman it mga awtoridad nga ro aktibidad hay makatau it ginaboeobanta nga $100 million (₱5.7 billion) nga benepisyo sa lokal nga ekonomiya.
Ro nasambit nga performance hay kaibahan sa promotional tour ni Lady Gaga para sa anang ikawaeo nga album nga ginatawag “Mayhem,” kun sa siin kaibahan ro mga kanta nga “Abracadabra” ag “Die With a Smile.”
Madumduman nga ro ulihi nana nga pagperform sa Brazil hay ko dag-on 2012 pa.
Hugut nga seguridad ro ginpatuman sa lugar, eakip ro 5,000 nga mga kapulisan nga nagbantay.
Si Lady Gaga hay bukon eamang ro unang artista nga nagtanyag it libre nga concert sa Brazil.
Ko Mayo 2024, si Madonna man nagpatigayon it libre nga concert sa nasambit man nga baybayon.
Nasayuran nga nagbiyahe pa ro mga fans halin sa nagkaeain-eain nga parte it siyudad agud nga masaksihan eamang ro performance it sangka kilaea nga pop superstar.
