KALIBO, Aklan—Ginpasiguro it provincial government it Aklan ro kaeowasan ag ikamayad nga eawas it mga trabahador sa isla it Boracay, nagapangunang tourist destination sa bilog nga kalibutan.
Gintaw-an it Sangguniang Panlalawigan si Governor Florencio Miraflores it awtoridad nga magpirma sa sangka kasugtanan sa Tourism Promotions Board, sangka sanga it department of tourism para sa coronavirus disease 2019 (COVID-19) testing it mga trabahador it isla.
Nataw-an raya it katumanan pinaagi sa resolusyon nga ginpasa it provincial board.
Ginpaburan it provincial government ro nasambit nga programa agud nga mag-eowas nga masiguro ro ikamayad nga eawas ag kaeowasan it mga trabahador hay mas pang mapabaskog ro kumpiyansa it mga turista nga eowas nga magbakasyon sa Boracay.
Nasayuran nga ro DOT pinaagi sa Special Contingency Fund it Tourism Promotions Board hay nagtaeana it P10 million pesos para sa “Project RT-PCR” testing para sa hospitality ag tourism workers it Boracay.
Nauna eon nga ginkalipay ni Malay mayor Floribar Bautista ro libreng swab tests it mga tourism workers sa isla agud nga malikawan ro pagkalhit it nasambit nga makamaeatay nga virus.
Ro proyekto hay magatau it daean sa periodic nga Reverse Transcription Polymerase Chain Reaction ukon (RT-PCR) testing nga libre.
Ro Boracay ro sambilog sa mga kauna-unahan nga tourist destinatioms sa nasyon nga ginbuksan sa mga turista.
Ko Oktubre 1 hay ginbuksan raya sa mga bakasyunista nga naghalin sa mga lugar nga nakapaidaeum sa General Community Quarantine.
Obligado ro mga raya nga magpakita it negatibong resulta it COVID-19 RT-PCR tatlong adlaw antes ro andang pagbiyahe sa Boracay.
Dapat man sanda nga magtinir sa DOT-accredited accommodation establishments.
