Sa tiempo it COVID-19 pandemic hay mas nataw-an it atensyon ro pag-alaga sa ikamayad nga eawas.
Nasaksihan ag naexperiensiyahan it kaabuan kon paalin nga mabutang sa aeang-aeang ro pag-angkon it mahinang pang-eawason.
Kumbaga mas may away ro mga healthy kaysa may sakit.
Raya man ro tiempo nga medyo nagguwa ro mga baeatian nga owa naton nasayuran nga aton nga gina angkon.
Ro sambilog sa mga rason kon ham-an nga maabu ro nahadlok nga magpatan-aw sa doktor bangud sa gastos.
Mag-eowas sa mga test, may posibilidad pang pabak-eon it mga sangkaterbang bueong.
Rason nga ginadahilan it kaabuan, imbes nga pampa-check-up, ipabakae eon lang it pagkaon ro kwarta.
Bilang resulta, ro sangka simpleng sakit, puwedeng mag-abu ag mag-grabe hasta nga mas pang mabahoe ro gastos ukon mamatay eon lang it eubusan bangud nga napabay-an.
Bilang sabat sa mabuhay eon nga ginakahadlukan it mga Pinoy, sangka proposisyon ro gindihon sa Kongreso.
Raya hay ro pag angkon it libreng medical check-up ro tanan nga mga pumueuyu kada dag-on.
Kaibahan kara ro pagpaidaeum sa screening, laboratory and diagnostic tests ag konsultasyon sa doktor.
Makabig nga maabu pang isyu sa ikamayad nga eawas ro nagakinahangean nga masabat it gobyerno.
Nagaeaum kita nga sa bag-ong administrasyon hay eubus raya nga matutukan.
Importante sa sangka nasyon ro pag angkon it maaeam ag healthy nga pumueuyu.
Mag-eowas sa gina angkon naton nga dunang manggad, ro healthy nga mga tawo hay may mabahoe nga kontribusyon sa pampulitika ag pang-ekonomiyang kahimtangan it sangka nasyon .
