KALIBO, Aklan — Magatau it libreng operasyon ro “Mending Faces” sa pakikipagbueuligan it lokal nga gobyerno it Aklan para sa mga sungi ukon cleft lip ag ngongo ukon cleft palate sa Aklan Provincial Hospital sa maabot nga Pebrero 2 hasta 7, 2020 .
Suno kay Jonathan Macabales, coordinator it Mending Faces nga ro nasambit nga surgical outreach it andang grupo hay nagatuyo nga magtau it bag-ong pageaum sa mga unga nga may makarondaya nga klase it kapansanan.
Makabig suno kana nga global crisis ro pag-angkon it mga unga nga natawo nga may cleft lip ag cleft palate rason nga ginatanyag it andang grupo ro libreng surgery operation para sa mga unga nga naga-edad it 6 months pataas ag maskin ro mga adult eon.
Maskin sigon ro andang pagkaon ag pamasahe hay libre ag kamana man ro akomodasyon engkaso nga ma-confine ro pasyente sa ospital.
Para sa dugang nga impormasyon ag pangutana, makipag-angot eamang sa pinakamaeapit nga health center sa inyong lugar ukon kay Dr. Vic Sta. Maria it Provincial Health Office ukon kay Shiela Mercurio sa Nursing Supervisors Office it Provincial Hospital kamana man sa clinic ni Dr. Arnold Jaime.
Pwede man nga magtawag ukon mag-text sa numero 0947-702-1022.
Magapatigayon sigon sanda it pre-screening sa mga pasyenteng gustong magpaidaeum sa operasyon kadungan ro pagtau kanda it mga vitamins agud nga masigurong healthy sa tiempo it operasyon.
Gin-engganyo nana ro tanan nga kalitan ro kahigayunan bangud nga haeos P50,000 ro posibleng magastos kon magpa-opera sa mga pribadong doctor.
