KALIBO, Aklan—Arestado ro sangka 28-anyos nga eaeaki kasunod it ginkasa nga entrapment operation it Kalibo PNP sa sangka hotel sa banwa it Kalibo.
Suno kay Police Major Bellshazzar Villanoche, hepe it Kalibo Police Station ro suspek hay sangka licensed engineer kung siin hana kara nga ibugaw ro anang kasimaryo nga babaye.
Ginapahayag nga naggamit it dummy account ro suspek para kontakon ro biktima pinaagi sa messenger.
Una sigon nga ginsumbilan it suspek ro biktima nga magsueod sa modeling apang nagpamalibad sigon raya.
Sa pihak kara, sigidas gihapon ro pagpangulit it suspek hasta sa nakumbinsi eon nana ro biktima.
Base sa report, kapin sa 4,000 pesos ro gina-offer nga bayad sa biktima sa kada costumer kung siin magabuoe eamang sigon it 300 nga kumisyon ro suspek.
Bangud sa nagaduda eon ro biktima hay gilayon kara nga magpangayo it bulig sa pulisya.
Sa ginpatigayun nga entrapment operation it mga otoridad madinaeag-on nga nadakpan ro suspek sa sueod it nasambitang hotel.
