Nagpromisa si Senate President Juan Miguel Zubiri nga maid-id nandang pagatun-an ro hagna nga Maharlika Investment Fund nga owa it pagkadelay sa proseso kasunod it panawagan ni Pangueong Ferdinand Marcos Jr.
Paga-umpisahan sigon nanda nga pagatun-an ro bersiyon it Kamara ag ro hagna nga pagpolido sa mga amyenda.
Ginpahayag ni Sen. Zubiri nga magakonsulta sanda sa tanan nga sektor ag igaplastar ro nagapangunang sueundanan kung haman it nagakadapat ro nasambit nga pondo ag engkaso gid man nga kinahangeanon hay pagasayuron kung ano ro mga nagakadapat nga safeguards para indi raya maging daean it anomaliya ag bukon it tamang pagdumaea.
Apang suno man kay Senate Minority Leader Aquilino Pimentel III nga mas manami nga indi eon lang pagpiliton nga iduso ro nasambit nga hagna kung owa gid man it nagakaigo ga rason ag kapital para sa pagbilog it sangka sovereign Wealth Fund sa nasyon.
Ginlaygayan man kara ro gobyerno nga tutukan eon lang ro ibang mga isyu kapareho it produksiyon it pagkaon, mataas nga inflation ag presyo it mga basic commodities.
Madumduman nga ko Enero 23, gindihon it bag-ong Senador nga si Mark Villar ro anang bersiyon it Maharlika Investment Fund sa Senado.
