KALIBO, Aklan — Bukon it pabor si Punong Barangay Rannie Tolosa it Caticlan ag LIGA ng mga Barangay President it Malay sa ginaproponer nga pagpatindog it daywang kilometrong tulay nga magakonekta sa isla it Boracay ag mainland, Malay.
Suno kana nga maskin owa pa sanda it ginabuytan nga plano ukon dokumento angot sa ginaduso nga proyekto it San Miguel Corporation , apang ginapanan-aw nana nga mas maabu ro disbentaha kaysa sa bentaha kon raya hay igapursige.
Nagapanguna sigon nga maapektuhan kara hay ro pangabuhian it mga maintok nga mga workers kapareho it mga boatmen, kargador ag iba pa .
Mag-eowas kara, mabahoe ro posibilidad nga makaangkon it problema sa peace and order bangud sa hilway eon nga makasueod ag guwa ro mga tawo .
Dugang pa nga indi eon makabig nga nagapangunang island destination ag matsa maduea ro kanami it Boracay kon pagabutangan raya it tulay.
Samtang, ginsuhestiyon ni Kapitan Tolosa nga imbes nga tutukan it nasambit nga kompaniya ro pagtukod it tulay mas mayad kon taw-an kara it katumanan ro andang promisa nga pag-transfer ag pagtukod it bag-ong Caticlan Elementary School nga naapektuhan sa ginhimo nanda nga expansion project it Caticlan airport bangud sa noise pollution kadungan sa pag-inabu it mga flight sa paeuparan .
