KALIBO, Aklan—Nagpaabot it abiso ro Office of the Provincial Veterinarian ukon OPVET sa mga pumueuyu nga likawan anay nga magbakae it mga ham ag pork products halin sa mga online sellers agud nga malikawan ro pagsueod it African Swine Fever ukon ASF sa probinsiya.
Nauna kara, nagpaguwa si Aklan governor Florencio Miraflores it Memorandum No. 0007-A ko Enero 18, 2021 nga ibawae anay ro pagsueod sa probinsiya it mga buhi nga baboy, pork products, by-products, ag livestock carrier ukon mga barko nga nagabiyahe it mga kasapatan halin ag paagto sa Region 8.
Mag-eowas kara, maabu man nga mga dokumento ro kinahangean nga i-presentar it tanan nga mga nagabiyahe it buhi nga baboy kapareho it transport carrier certificate; handler’s license; vaccination certificate; veterinary health certificate; ASF-free certification; shipping permit; ag certificate of disinfection nga gina-isyu sa mga borders it Aklan.
Suno kay Dr. Joseph Lachica, Veterinarian II it OPVET-Aklan nga mas pang ginhugtan it provincial government ro andang kampanya kontra sa ASF.
Raya hay matapos nga makumpirma halin sa Department of Agriculture Region 8 nga ro ASF outbreak hay naka-abot eon sa Leyte ko enero 15, 2021 ag iba pang lugar sa mindanao.
Mag-eowas kara, may nailista man nga kaso sa probinsiya it Masbate.
Kabulig sigon sanda it Bureau of Animal Industry sa hugut nga pag-monitor ag pagbantay sa tanan nga mga borders it probinsiya agud nga masiguro nga owa it makasueod nga mga buhi nga baboy ag pork products halin sa mga lugar nga may kaso it ASF.
Gindugang pa ni Dr. Lachica nga ro ginapasugtan makaron nga makasueod sa aklan hay ro mga baboy nga halin sa Romblon.
Sa makaron hay nataeupangdan nga nagnaba eon ro presyo it karneng baboy sa aklan matapos nga magpatuman it price ceiling sa luzon.
Ro Western Visayas suno kana hay nagapabilin nga free zone rason nga nakapadaea pa it kapin sa 1,600 nga buhi nga baboy ko nagtaliwan nga adlaw sa metro manila sa inisyatibo it department of agriculture.
Engkaso nga makasueod sa aklan ro ASF, delikado sigon raya sa mga naga-alaga it baboy bangud nga kinahangean nga i-culling ukon katayon ro andang mga alagang baboy sa sueod it 500 meter radius halin sa lugar nga nailista ro kaso.
