KALIBO, Aklan — Ginpaabot it Commission on Elections (Comelec)-Kalibo nga owa gihapon it kandidato para sa lokal nga posisyon ro nagdihon it andang Certificates of Candidacy (COC) sa ikatlong adaw it filing sa banwa it Kalibo .
Suno kay Atty. Christian Itulid, election officer IV it Comelec-Kalibo nga nagapabilin nga maeanghay ro sitwasyon bangud nga owa gihapon it kandidato ukon tagasuporta ro nag-agto sa andang taeatapan hasta ko Huwebes.
Ginaeauman sigon nanda nga magadagsa ro mga magakandidato sa ulihing adlaw nga gintaeana para sa COC filing bangud sa mga talimad-on nga swerte ro numero nga 8 .
Hasta sa makaron suno kana hay owa sanda nakabaton it mandu halin sa national headquarters nga makaangkon it extension sa COC filing.
Ginpahayag pa kara nga magapabilin nga bukas ro andang opisina umpisa alas 8 it agahon hasta alas 5 it hapon hasta sa Oktubre 8, 2024, kaibahan ro Sabado ag Domingo.
Sa pihak kara, ginpahayag ni Atty. Itulid nga may pila eon man nga mga kandidato ro nag-request kanda it COC form.
Pagabatunon sigon nanda ro COCs ag Certificates of Nomination and Acceptance (CONA), basta nga kompleto ro kopya ag tama ro andang pag-sueat sa form.
Samtang, padumdum ni Atty. Itulid nga bangud sa pag-umpisa it Ati-Atihan season kasunod it pagpatigayon it opening salvo, dapat nga likawan it mga magakandidato kaibahan ro andang mga tagasuporta ro mala-fiesta nga pagdihon it COC.
Maisot eamang suno kana ro andang opisina rason nga i-limit hasta sa maximum nga tatlong katawo ro daehon sa sueod .
