Lima sa siyam nga deklaradong wetlands sa Boracay, naduea eon sa mapa

KALIBO, Aklan – – – Eubusan eon nga naduea sa mapa ro lima sa siyam nga deklaradong wetlands sa isla it Boracay.

Raya ro nadiskubre sa gin patigayun nga senate inquiry sa pagpanguna it Senate Committtee on Environment and Natural Resources sa isla kahapon.

Base sa datus, siyam pa ro deklaradong wetlands sa Boracay ku dag-un 2008.

Apang, ap-at eon lang raya sa makaron matapos nga ro lima sa mga raya hay gin patukuran it istraktura.

Nasayuran nga daywang hotel ag sangka mall ro presenteng gin patukod sa gina agyan it tubi ukon wetlands dahilan nga naduea raya sa mapa.

Mag eowas kara, natukiban nga sangka hotel man ro gin patukod sa gin deklarang forest land.