KALIBO, Aklan — Limang centenarians halin sa probinsiya it Aklan ro nakabaton it tig-P100,000 halin sa gobyerno pinaagi sa Department of Social Welfare and Development (DSWD)-Aklan.
Mag-eowas sa nasambit nga kantidad ag pagkilaea hay nakabaton sanda it dugang nga cash gift nga tig-P10,000 halin sa provincial government.
Raya hay ginaeakipan nanday Diosdada Caspe it banwa it Kalibo, Caridad Regueta it Makato, Maria Laura Estures it Tangalan , Veronica Nobleza it Madalag ag Ireneo Bautista it New Washington nga ko kan-o gid eamang hay nagtaliwan eon sa pihak nga kinabuhi .
Ro mga senior citizens nga naka-abot sa edad nga syen anyos ukon masobra pa hay kwalipikadong magbaton it centenarian gift sandig sa Republic Act No. 10868 ukon mas kilaea sa tawag nga Centenarians Act of 2016 .
Madumduman nga ko Mayo 4, 2017, 30 nga centenarians ro nataw-an man it tig-P100,000 nga cash gift nga kon sa siin ro pinakamagueang hay naga-edad it 117 anyos.
