KALIBO, Aklan—Maswerteng naeuwas it mga mangingisda sa banwa it Makato ro limang mangingisda halin sa Brgy. Cawayan, New Washington ko Pebrero 5.
Suno kay Andrew Pastrana, sambilog sa mga naeuwas nga mangingisda nga mabahoe ro andang pagpasaeamat sa mga tawo nga nagbulig kanda sa tunga it eawod.
Suno kana, plano kunta nanda nga magpangisda sa bahin it Sibuyan Sea apang masyadong mabaskog ro hangin ag humbak rason nga nakaangkon it aberya ro andang ginasakyan nga pump boat.
Ginkabuliganan sigon nanda nga limason ro tubi nga nagasueod sa andang baroto apang owa nanda raya masarangan tuga it sobrang kagaoy.
Haeos sang gabi-i sigon sanda nga owa it kinaon matapos nga anuron it mga daeagkuan nga humbak ro aang baeon nga mga pagkaon ag kagamitan.
Maayos ag kalmado pa sigon ro baybay sa andang pagpaea-ot rason nga nakibot sanda kat gulping mag-eain ro tyempo.//Sa makaron hay una eon sa eowas nga kahimtangan ro limang mangingisda.
Sa pihak nga parte, personal nga ginhatod it mga katapo it Municipal Disaster Risk Reduction and Management Council (MDRRMC)-Makato ro limang mangingisda nga puro residete it Brgy. Cawayan, New Washington para makauli sa tagsa-tagsa nga pamilya.
Suno kay Punong barangay Rex Regalado it nasambit nga lugar nga nagpaea-ot ro mga biktima ko Pebrero 4 it hapon gamit ro pump boat nga ginapanag-iyahan it anang magueang.
Nagapabilin man nga missing ro gingamit nanda nga baroto nga posibleng eumugdang matapos nga mapuno it tubi.
Nakataeana nga magbaton it bugas ag pilang relief goods halin sa barangay council it Cawayan ro nasambit nga mga mangingisda.
