Kalibo Aklan ——Kapin sa limang ka mga indibidwal ro naaresto it mga otoridad matapos nga mag-eabag sa ginapatuman nga COVID-19 curfew ordinance sa pilang mga daeanon sa banwa it Kalibo.
Base sa report, samtang nagapatrolya sa kahabaon it D. Maagma Street ro mga katapo it Kalibo PNP andang naaktuhan nga nagapanikangon sa nasambitang lugar ro sangka eaeaki nga nakilaea kay Mark Andrian Dela Peña, 22-anyos ag residente it Brgy. Pook sa nasambitang banwa.
Samtang, nadakpan mat-a sa porsyon it Oyotorong Street si Jovelon Aranas, 32-anyos.
Naaresto man sa daeanon nga sakop it D. Maagma Street ro tatlong ka mga dugang nga persona nga nakasakay it tricycle nga nakilaea kanday Marco Bautista, 29-anyos, residente it Brgy. Laguinbanwa East, Numancia; Alex Sacarias, 35-anyos ag Ina Balatbat, 29-anyos, parehong residente it Oyotorong Street, Kalibo.
Ro mga nasambitang persona hay parehong una sa idaeom it makahieilong nga ilimon ag nagbayolar sa ginapatuman nga curfew hour kamana man nga owa it nagakaigo ukon balido nga rason sa andang pagpabilin guwa it panimaeay.
