Arestado ro limang kaeaeakin-an, kaibahan ro sangka menor de edad, matapos maimbolbar sa pagpanakaw sa sangka grocery store sa Poblacion, Ibajay bandang alas- 11:50 it gabi it Hunyo 15.
Suno kay, PMaj. Rajiv Salbino, chief of police it Ibajay MPS, nabuoe it mga suspek ro tatlong kahon it sigarilyo, daywang ka cellphone, ag cash nga nagabalor sa P40,000 pesos.
Base sa andang imbestigasyon ag pag-usisa sa CCTV fottage it nasambit nga grocery store, tatlo sa mga suspek ro nag-sueod sa establsyemento gamit ro backdoor nga andang ginsamad, samtang ro daywa hay nagserbe bilang lookout.
Dugang pa ni PMaj. Salbino, naaresto ro mga suspek matapos nga masita it 2nd Aklan Provincial Mobile Force Company ro andang ginasakyan nga topdown ag madiskubrehan nga may daea rayang mga kahon it sigarilyo apang uwa it mapakita nga dokumento nga anda rayang ginbakae.
Insigida man nga ginkumpira it tag-iya it grocery store ro mga kagamitan nga narekober, kaibahan ro sangka vault nga ginpilak sa may bahin it Nabas ag tatlong cash drawers nga gin-aywanan sa sangka sementeryo sa Poblacion, Ibajay. Sa kabilugan, ginabueubanta nga kapin sa P250,000 ro mga gintakaw nga kagamitan.
Sa man sa andang imbestigasyon, plano it mga suspek nga ibaligya ro mga sigrailyo sa barato nga haega ag pagagamiton ro kwarta patabok it Mindoro.
Nagapangatubang makaron ro mga suspek sa kasong robbery, samtang ro menor de edad hay magapaidaeom sa pag-alaga it Department of Social Welfare and Development (DSWD).
