KALIBO, Aklan—Nag-umpisa eon ro limitadong face to face classes sa pilang kolehiyo sa probinsiya it Aklan.
Suno kay Dr. Elvis Mason-Ramos, Dean it College of Nursing, Master of Arts in Nursing ag Masters in Nursing it Aklan Polytechnic College nga naka-comply sanda sa mga requirements rason nga ginpasugtan nga magbalik-eskwela ko Nobyembre 4, 2021.
Nasayuran nga kaibahan ro nasambit nga eskwelahan sa ginpasugtan it Commission on Higher Education ukon CHED nga magpatigayon it in-person classes nga may gina-offer nga medical ag allied health courses.
Ginpaathag ni Dr. Ramos nga agud nga masunod ro physical distancing, limitado eang sa 6 hasta 8 nga mga estudyante ro ginapasugtan nga makasueod sa classroom ag mga laboratory.
Gintunga man sigon sa mga grupo ro mga nursing student.
Antes nga makasueod sa eskwelahan, dapat nga nakasuksok it facemask ag face shield kamana man nga kinahang-ean nga busog bangud nga hasta nga pwede hay bawae ro magkaon.
Kaabuan man sigon sa andang mga estudyante ag faculty member hay bakunado, apang kinahang-ean gihapon nga sundon ro minimum health protocols.
Ro ginapasugtan eamang nga makasueod sa pisikal nga klase hay ro 3rd year hasta 4th year college bangud nga kaabuan sa mga raya hay 20 anyos eon pataas.
Dapat man nga magpa-miyembro ro mga estudyante sa PhilHealth.
Ginpahayag pa ni Dr. Ramos nga plano man it eskwelahan nga engkaso nga makaangkon it related learning experience ukon duty sa ospital ro andang mga estudyante hay magabo-oe sanda it dormitory para kanda agud nga malimitahan ro anang pagpinanaw.
