Una sa risgo nga mapa-deport ro una sa linibo nga bukon it dokumentadong Pinoy workers sa Amerika sa idaeom it Trump administration nga mahimo magresulta sa permanenteng pagbawae kanda nga uman nga magsueod sa US.
Bangud kara, nagpanawagan eun si Philippine Ambassador to the US Jose Manuel Romualdez sa mga undocumented Pinoy workers idto nga boluntaryong maghalin o umpisahan nga iproseso ro andang mga dokumento para mag-angkon it legal status bago magpungko sa White House si US President-elect Donald Trump sa masunod nga dag-on.
Suno kay Amb. Romualdez, ginabuebanta nga una sa 250,000 hasta 300,000 ro bukon it dokumentadong Pilipino nga presenteng una sa Amerika.
Dugang pa kara nga mahimo nga ipadayon ni Trump ro anang plano nga maabuan nga pagpadeport sa mga illegal immigrant nga magakinahaeangan it maabong resources.
Sa makaron, medyo impossible nga indi ma-detect ro mga bukon it dokumentadong indibidwal sa Amerika bangud interconnected eun ro mga nagkaeain-eain nga US departments halin sa immigration hasta sa transportation security administration (TSA).
Mag-euwas kara, mahimo man magpasa ag magpatuman it mas strikto nga immigration laws ro Trump administration nga ginasuportahan eun makaron it US Congress nga kontrolado it Republicans.
Ku Biyernes, ginpamilit ni Trump nga tumanon nana ro anang promisa sa anang kampaniya para sa mabahuean nga deportation effort sa kasaysayan it Amerika.
Sa pihak man kara, ginpamilit ni Amb. Romualdez nga mahimo paeawigon ro legal aid para sa mga Pilipino para legal nga makapagtrabaho sa Amerika.
May una man sigon nga nagapadayon makaron nga pag-istorya sa mga opisyal it Guam para mapataas ro pag-hire sa mga Pilipinong construction workers sa mga military bases.
Mas gusto sigon it mga Amerikano ro mga trabahador nga Pilipino bangud sa andang kamayad.
Sa healthcare sector man, may pila sigon nga mga health services companies ro nag-eapit kana para mapataas pa ro numero it mga Filipino nurses nga mahimo ma-hire halin sa Pilipinas.
Ginbulgar man it PH Ambassador nga sa kamatuoran may mga Filipino-Americans nga nagatrabaho sa business empire ni Trump partikular eun sa anang mga hotel ag golf clubs.
Ginakilaea sigon ni Trump ro mga Pilipino bilang mayad nga mga trabahador.
