NATIONAL News — Igabakwit it Pilipinas ro kapin sa 11,000 nga mga pumueuyu kara halin sa Lebanon sa oras nga magtabok eon it border ro Israeli forces para maglunsar it ground offensive kontra sa Hezbollah.
Raya ro ginpahayag ni Foreign Undersecretary Eduardo de Vega sa press conference.
Madumduman nga mas nag-grabe ro mga opensiba it Israel kontra sa Iran-backed Hezbollah sa Lebanon nga nagresulta sa pagkamatay it ginatos nga katawo makaron nga domingo.
Ginpamalibaran it Israel ro panawagan it US nga 21 diyas nga ceasefire.
Owa pa it kumpletong detalye angot sa pagahimuon nga repatriation.
Nauna eon nga nagpanawagan ro gobyerno sa mga Filipino sa Lebanon nga maghalin eon antes pa nga ipapundo ro biyahe it mga eroplano pasueod ag paguwa it Beirut nga ginbalewala man it kaabuan.
Sa makaron hay owa pa it nailistang namatay nga Pinoy sa pag-atake it Israel sa Lebanon.
Dugang pa nga kapin sa 500 eamang nga Filipino ro nagbaton it offer it gobyerno nga maghalin eon sa Lebanon.
Suno kay Filipino ambassador to Beirut Raymond Balatbat, 196 Filipino ro nagbiyahe paguwa it southern Lebanon, kun sa siin nakatutok makaron ro Israel.
Kaabuan sa mga Pinoy nga nagatrabaho sa nasyon hay una sa central Lebanon partikular eon sa Beirut.
