Ginakabig it Lion Heart Security Agency nga isolated case ro ginhimo nga krimen it sambilog sa andang mga ginahuptan nga gwardya nga si Mark Archie Torrefeil, 31-anyos it Brgy. Cajilo, Makato nga imaw ro responsable sa makangiedlis nga kamatayon it empleyadang si Bonna Hercia Ambay it Brgy. Nauring, Pandan, Antique.
Suno sa tag-iya it nasambit nga security agency nga si Michael Anthony Bercades, bukon it tanan nga gwardya hay kaparehas ni Torrefeil, maabo pang mga professional security guard nga may dignidad.
Ro pahayag ni Bercades hay kasunod man sa mga nagguwang balita nga inde eon masaligan maskin ro gwardya.
Ginpaathag kara nga nag-agi sa legal ag nagakaigong proseso ro paghire nanda it mga security guards kaeakip eon kara si Torrefeil.
Genuine suno kana ro mga dokumento nga ginpresentar it suspek rason agud nga imaw hay ihire bilang anda nga empleyado.
Apang, ginpasiguro kara sa pamilya Ambay nga makipagbuligan ro andang ahensya para mataw-an it hustisya ro kamatayon it daeaga.
Uwa suno kana sanda nagatolerar it empleyado ag nagpaabot eon man raya it simpatiya sa pamilya Ambay.
