Ginpaguwa it Regional Police Office ro resolusyon nga nagamando sa pag-revoke it driver’s license ni Maynard Engaling, nga sangkot sa motorcycle accident nga nagresulta sa pagkamatay ni Gerald Roldan ukon mas nakilaea bilang “Petix Akean.”
Suno kay LTO Aklan Chief Engr. Marlon Velez, ginabawi ro lisensya kon may substantial evidence nga nagapakita it pag-eapas.
Suno kana hay administratibo nga kaso ag bukon pareho sa criminal ukon civil case.
Sa lima nga iba pang sangkot sa insidente, may sambato nga ginakasohan sa reckless driving matapos mapamatud-an sa camera it motorsiklo nga nakaabot sa 133 kilometro kada oras ro pagpadaeagan, mas mataas sa standard speed limit nga 80 kilometro kada oras.
Samtang, padayon pa ro imbestigasyon sa iba pang mga sangkot bangod uwa pa it nagakaigo nga ebidensya nga nagapakita nga may pageapas sanda.
Ginpahayag man ni Velez nga si Petix Akean, nga nahaeubong eon ku adlaw it Lunes, Setyembre 21, hay isaeang ka road safety advocate nga pirming nagapasa it impormasyon sa LTO nahanungod sa mga aksidente sa karsada.
Samtang, sa mga dokumento it motorsiklo ni Engaling, nasayuran nga valid ro registration kara ag nakarehistro pilang buean antes natabo ro insidente.
Ro plaka hay available sa dealer pero uwa pa na-release kat natabo ro aksidente, ag na-release eon lang pagkatapos it insidente.
