Hugut ro naging mandu ni President Ferdinand Marcos Jr. kay Department of Social Welfare and Development (DSWD) Secretary Erwin Tulfo.
Raya hay ro limpyuhan ro listahan it mga benepisyaryo it special assistance programs it gobyerno ukon mas kilaea bilang Pantawid Pamilyang Pilipino Programs ukon 4Ps.
Raya hay bangud nga maabu sa mga ginasugid nga ‘graduate’ eon sa nasambit nga conditional cash transfer hay nagapamalibad nga isurender ro account ag padayun nga nagapanipueos sa ayuda.
Basi ngani nga pila sa mga raya hay may trabaho eon apang padayun nga nagabaton it cash grants.
Samtang, maabu ro eubus nga nagakinahangean apang bukon it kaibahan sa listahan.
Sambilog pa sa kinahangean nga mataw-an it atensyon hay kon kuwalipikado gid man baea ro mga nataw-an kara.
May mga reklamo nga maabu ro kaibahan sa nataw-an it grasya apang bukon man it matuod nga pobre ag kon nagakinahangean man apang owa ginagamit sa tama .
Nataeupangdan nga matapos nga mabo-oe ro kwarta sa 4Ps, diretso eon sa ‘toma’ ukon ‘tongits’ ro iba.
Ginagamit eang gali sa raya nga bisyo rason nga dapat nga masubaybayan ag mamonitor it mga natungdan.
Ro ginabulig kanda hay dapat nga para sa kamaeayran it pamilya ag bukon it gina-obra eamang nga gatasan ro gobyerno.
May kahigayunan man nga dikara eon lang nagasalig ag owa eon naga usoy it trabaho nga makabulig kanda
Pensionado it gobyerno maskin nga bukon eon it sueod sa katuyuan it gobyerno.
Sambilog pa sa dapat nga maimbestigahan it DSWD hay ro reklamo nga kon sin-o eamang ro mabaskog sa barangay captain ukon iba pang brgy. officials ro kaeabanan nga kaibahan sa listahan it nakapanipueos
Kamana man ro igbata ag andang mga amigo.
Makaron hay tapos eon ro mga malipayon nga adlaw it mga pila sa mga nagapamentaha sa programa .
Ro 4Ps hay ro pagtau it gobyerno it conditional cash grants sa mga ginakabig ‘poorest of the poor’.
Raya hay agud nga masabat ro pagkinahangean it mga unga nga maka-eskwela.
Manami ro katuyuan , kabay nga indi pag abusuhon.
