Maskin nga owa pa pormal nga nakapungko sa puwesto, may mga plano eon ro mga bag-ong opisyal sa mga programa ag proyekto nga pagapadayunon it gobyerno.
Kapareho it Pantawid Pamilyang Pilipino Program ukon 4Ps.
Sa baylo nga kada buean, gusto ni incoming Department of Social Welfare and Development (DSWD) secretary nga obrahon nga sangka bagsakan ro pagtau it conditional cash assistance sa mga benepisaryo.
Sa makaron, kun nagabaton it P1,200 hasta P1,400 pesos kada buean ro benepisaryo it 4Ps, nga puwedeng i-lump sum it sang dag-on, ro P12,000 hasta P14,000 pesos hay pwede sigon nga ipang-negosyo.
Puwede man sigon nga dugangan pa it hasta sa P20,000 pesos.
Tuyo sigon kara nga mabuligan ro magpamilya nga makatindog eon sa kaugalingon nanda nga mga siki.
Pwede sigon nga umpisahan it amat-amat, apang kon pumalpak, igabalik sa kada buean nga ayuda.
Maskin nga ginklaru nga pagatun-an pa it mga eksperto ag social workers ro nasambit nga suhestiyon.
Samtang, antes kunta nga makaangkon it mga pagbag-o sa programa, unahon anay ro mismong listahan.
Kabay nga ma-update anay ro listahan it 4Ps beneficiaries.
May mga reklamo nga ro iba sa mga nagabaton it ayuda hay bukon gid man it pobre.
Samtang ro mga angay ag bagay nga mabuligan hay bukon it kaibahan.
Dapat nga masaea it mayad ro mga ginataw-an it ayuda para patas sa tanan.
Kinahangean man nga obrahon nga digitalize ro pagpanupod it ayudang pinansiyal agud nga mapadasig ro proseso.
Siguraduhon man nga matuman ro mga kondisyon kapareho it nabdos nga dapat magpa-pre-and postnatal care, ag magtambong sa childbirth it trained professional; ro mga ginikanan ag guardian, dapat magtambong sa family development sessions, nga kaibahan ro topiko sa responsible parenting, health, and nutrition; ro mga unga nga naga-edad 0-5 hay kinahangean nga magbaton it regular preventive health check-ups ag vaccines; ro mga unga nga naga edad 6-14 hay dapat magbaton it deworming pills it daywang beses sa sang dag-on; ro mga unga nga naga edad 3-18 hay dapat nga mag eskwela ag mapabilin ro attendance sa 85% it class days kada buean.
Maswerte ro mga nataw-an it ayuda halin sa pagbueuligan it pumueuyu, rason nga kabay nga indi kunta nga pag uyangan.
