Kalibo Aklan ———-Ginasapinal eun makarun it Department of Agriculture (DA) ro listahan it mga corn farmers nga makabatun it fuel subsidy.
Suno kay Ms. Salome David, OIC it Office of the Provincial Agriculturist nga sa makarun hay ginapaidaeum pa sa mabusisi nga validation ro aplikasyon it mga corn farmers association nga gustong makabatun it nasambitan nga ayuda.
Raya hay bangud nga pamaagi sigon sa grupo ukon asosasyon ro pagtao it ayuda ag bukon it kada indibidwal.
Apang ginklaro man kara nga bukon it cash ro igatao it taeatapan.
Ro nasambitan nga ayuda hay pagaboe-on it mga benipisyaryo sa accredited supplier kung alin nga station ro gin-credit it DA.
Nasayuran nga sa pronisya it Aklan hay may una eamang nga haeos 20 ka mga asosasyon it corn farmers.
Madumduman nga nauna eun nga gin-anunsiyo it DA ro pagpanudpod it fuel subsidy sa mga corn famers ag fisher folks kasunod sa gihapon it padayun nga pagtinaas it presyo it gasolina.
Sa pihak nga parte ginpahayag man ni Ms. David, nga hasta makarun hay sigidas sa gihapon ro andang ginahimo nga monitoring sa mga gin-isyu nga farm machineries para sa mga mangunguma sa probinsya agud masiguro nga raya hay ginagamit it maayos.
