Kalibo Aklan —–Ginkasubo ni League of the Municipalities of the Philippines (LMP-Aklan) Chapter President ag Ibajay Mayor Jo-en Miraflores ro natabu sa banwa it Lezo matapos nga naga-doble kayod makaron ro mga otoridad sa aklan agud nga ma-usoy ro mga tawo nga nakaangkon it direct contact sa sangka nag-uli nga Overseas Filipino Worker (OFW) nga nag-positibo sa coronavirus disease (COVID-19).
Gina-alegar nga maskin nga owa pa natapos it 28 anyos nga seafarer ro anang strict home quarantine hay nagguwa raya sa andang baeay ag sa owa ginaeauman hay nagpositibo imaw sa sakit base sa ginpaguwa nga laboratory test result it Western Visayas Medical Center (WVMC) ko Hunyo 7.
Aminado si Mayor Miraflores nga umpisa nga ginlunsar it National Inter-Agency Task Force ro “Balik Probinsiya Program” ag insigidang pagpa-uli sa mga OFW’s hay bumuhos ro mga OFW’s ag locally stranded individuals rason nga ginkueang ro mga quarantine facilities ag ligtas COVID centers sa probinsiya .
Bangud kara, nagpaguwa sigon it bag-ong protocol ro Department of Health (DOH) nga sa sangka kwarto hay pwedeng mag-share ro daywang katawo.
Mag-eowas kara, ginapasugtan eon nga mag-strict home quarantine ro mga OFW’s nga owa nakitaan it sintomas it COVID-19 ag nag-negatibo sa Reverse Transcription-Polymerase Chain Reaction (RT-PCR) testing sa Manila .
Base sa report, ro nasambit nga seaman hay nag-abot sa nasyon halin sa Germany ko Marso 30 ag nagtinir sa anang mga igbata sa Manila .
Ginboe-an imaw it RT PCR test ko Mayo 7 ag Mayo 10 hay nagguwa ro anang resulta nga imaw hay negatibo .
Nag-abot imaw sa Iloilo sakay it sweeper flight ko Mayo 25 ag nagpaidaeum sa registration ag assessment procedures sa Aklan Training Center ko Mayo 26 ag temporaryong nagtinir sa sangka hotel sa banwa it Kalibo nga gintaeana nga LCC it LGU-Lezo .
Ko Mayo 29 hay ginboe-an imaw it swab specimen sample ag nagguwa ro resulta ko Hunyo 7.
