KALIBO, Aklan—Hugut nga ginapatuman ro ordinansa angot sa load limits para sa mga truck.
Raya ro gintaw-an it punto ni Sangguniang Panlalawigan member Jay Tejada, author ag sponsor it provincial ordinance on road safety sa interview it Bombo Radyo.
Suno kana, obligado ro kada Local Government Units (LGUs) nga mag-apruba it tagsa-tagsa ka mga Municipal Traffic Code.
Nakasueod sigon kara ro regulasyon sa pagpatpat it truck ban, siin ag kun anong gaagi, kabug-at it karga, pag-obserba it traffic rules and regulations nga internationally accepted standard ag iba pa.
Ro enforcement sigon kara hay ginatugyan sa kada munisipyo.
Maskin sigon sa mga eskwelahan hay ginaturo eon raya para makaangkon it kasayuran ro kada estudyante sa mga laye sa karsada.
Ro sin-o man nga madakpan nga naga-eabag sa ordinansa hay ginapapanaugan it multa.
Ginpahayag dugang nga obligado nga magsunod ro mga trucks sa gintaeana nga bug-at ukon gross vehicle weight.
Tuyo sigon kara nga maprotektahan ro provincial roads sa kahalitan nga ginatuga it mga overloaded trucks.
May kaangtanan kara, nagdeklara man sigon sanda it road safety prevention ukon awareness month kada buean it Hulyo.
Raya hay para mataw-an it importansya ro pagsunod sa mga batas-trapiko agud mapabilin ro kaayusan sa mga daeanon.
